أنا عندي 3 بنات، الكبيرة عندها 30 سنة، وجوزي عنده إعاقة في رجليه وبيتحرك على كرسي متحرك، وأنا اللي بشيل مسؤولية بناتي وبخلص كل أمورهم، لأن معنديش ولاد رجالة.

بنتي الكبيرة اتخطبت من حوالي سنة، والعريس كان باين عليه الاحترام، ومن يوم قراءة الفاتحة جابلها دبلة، ومن كام يوم كتبوا الكتاب، والفرح لسه فاضل عليه 3 شهور. يوم كتب الكتاب جابلها الشبكة، وكانت عبارة عن خاتم وغويشتين ومعهم الدبلة بتاعة قراية الفاتحة

بعد ما المأذون مشي، بنتي كانت قاعدة مع صاحباتها وطلعوا الشبكة علشان يتصوروا بيها، وفي وسط التصوير أم العريس كلمتها وقالت لها: هاتي الشبكة يا حبيبتي، عايزة أوريها لمرات أخويا.

بنتي ردت عليها بكل ذوق: حاضر يا طنط، بس ممكن أتصور بيها أنا والبنات الأول؟

وش أم العريس اتغير وقالت لها: يعني إيه؟ هو أنا بطلب منك حاجة غريبة؟ أنا بقولك هاتي الشبكة!

بنتي اتكسفت من الناس وبدأت تقلع الشبكة من إيديها، لكن العريس كان قريب منها، فقام شدها من إيدها بعصبية وقال لها: لما أمي تطلب منك حاجة تنفذي من غير كلام، إنتِ مش كل شوية هتجادلي في كل كلمة!

بنتي حاولت تشرح له إنها ما رفضتش، لكنه زعق فيها ومد إيده وضربها بالقلم على وشها قدام كل الموجودين!

أنا اتجمدت مكاني من الصدمة، وفوقت على صوت بنتي وهي بتعيط. قمت رايحة ناحيته وقلت له: إنت بتعمل إيه؟ هو إنت عايز تكسر بنتي من أول يوم؟ إنت فرحان بالشبكة دي لدرجة إنك تشدها من إيديها وتوجعها، وترفع إيدك عليها وتضربها بالقلم قدام الناس؟ شبكتك عندك يا ابني، خدها ومش عايزين منك حاجة، وإنت هتطلق بنتي، والفرح مش هيتم، وكل واحد يروح لحاله.

أمه دخلت تحاول تلم الموضوع وقالت لي: إنتِ هتعملي كل ده علشان موقف؟ ده ابني اتعصب شوية، والموضوع ما يستاهلش.

لكن ابنها قال لي: أنا مش هطلق، دي مراتي وعلى اسمي، ومحدش له إنه يدخل بيني وبينها، وأنا حر أتصرف مع مراتي زي ما أنا عايز.

قلت له: لأ، ما تفتكرش إنك عشان كتبت الكتاب خلاص بقيت تقدر تكسرها. إنت فاكر إنها ملهاش حد يقف لها؟ أبوها ظروفه الصحية صعبة ومعندهاش إخوات رجالة، لكن أنا بالدنيا كلها في ضهرها. اللي يمد إيده عليها من أول خلاف، أنا مش هأمنه عليها بعد كده.

المشكلة إن بعد ما الناس مشيت، جوزي نفسه قعد يقول لي: عدي الموقف، البنت عندها 30 سنة، ومش عارفين فرصة زي دي هتجيلها تاني ولا لأ، والواد يمكن أعصابه فلتت منه وهيتعلم من غلطه.

وبنتي كمان بتعيط وبتقول لي: يا أمي هو كويس، يمكن كان مضغوط، وأنا مش عايزة جوازتي تبوظ بسبب موقف حصل وقت عصبية.

أنا قلبي واجعني عليها، وفي نفس الوقت مش قادرة أنسى منظر إيده وهي بتنزل على وش بنتي في يوم كتب كتابها، ولا إنه بدل ما يعتذر قال لي إنه حر يعمل اللي هو عايزه.

دلوقتي كل اللي حواليا بيضغطوا عليا علشان أرجع في كلامي، وأنا خايفة أكون بظلم بنتي بقراري، وخايفة أكتر أرجعها له وأكون أنا اللي سلمتها بإيدي لواحد بدأ معاها حياته بالضرب والإهانة.