أنا خاطب وكاتب كتابي بقالي سنتين، وفاضل على فرحي خمس شهور. أنا وخطيبتي بنحب بعض ومتفاهمين، وكنت مستني اليوم اللي نجمع فيه في بيتنا، لكن من أربع شهور أخويا الكبير توفى في حادثة بالعربية، ربنا يرحمه.
أخويا كان متجوز بقاله سنة ونص، وعنده ولد صغير عنده 8 شهور، وكان شغال بره مصر وربنا موسع عليه، وسايب لمراته وابنه شقة تمليك وعربية وفلوس في البنك. ومن يوم وفاته وأنا بقيت بروح لهم باستمرار، أطمن عليهم وأقضي لهم طلباتهم، خصوصًا إن مرات أخويا لسه في العدة وفاضل أيام وتخلص.
في الفترة دي أمي بدأت تفتح معايا كلام عن مرات أخويا والولد، وفي يوم قالتلي صريحة:
بص يا ابني، أنا عايزاك تتجوز مرات أخوك بعد ما تخلص عدتها، والولد يفضل وسطنا وما يدخلش حياته حد غريب.
قلتلها: إنتِ بتقولي إيه يا أمي؟ أنا كاتب كتابي بقالي سنتين وفاضل على فرحي خمس شهور!
قالتلي: اركن موضوع خطيبتك شوية، واتجوز مرات أخوك الأول، وبعد كده ابقى شوف هتعمل إيه.
قلتلها: يعني أعمل إيه في بنت الناس اللي مستنياني من سنتين؟ دي مش حاجة أركنها وأرجعلها وقت ما أحب.
قالتلي: يا ابني مرات أخوك لسه صغيرة، وابن أخوك محتاج حد يكون مسؤول عنه، وإنت أولى بيهم من الغريب.
في الأول كنت رافض الفكرة، لكن مع تكرار كلام أمي بدأت أفكر فيها. ومش هكدب عليكم، مرات أخويا عندها 25 سنة، يعني أصغر مني وأصغر من خطيبتي اللي عندها 27 سنة، وما شاء الله عليها جميلة ومحترمة، وبعد ما أمي فتحت الموضوع بقيت أبص لها بشكل مختلف، وبدأت أتخيل شكل حياتي لو اتجوزتها.
حكيت لخطيبتي إن أمي بتتكلم في موضوع مرات أخويا، واتضايقت جدًا وقالتلي: إنت بجد ممكن تفكر في حاجة زي دي؟ أنا بقالي سنتين مستنياك وبجهز نفسي لبيتي، وفاضل شهور وأبقى مراتك، إزاي تحطني في الموقف ده؟
قلتلها: أنا لسه ما أخدتش قرار، ومش عايز أظلم حد.
قالتلي: أنا مش هقبل إنك تتجوز عليا، ولو إنت مصمم على الموضوع ده يبقى كل واحد يروح لحاله.
بعدها أمي بدأت تقنعني إن فيه حل تاني، وقالتلي: إنت بتجهز شقة إيجار وبتصرف عليها، وهتفضل كل شهر تدفع إيجار، إنما أخوك سايب شقة تمليك وعربية، يعني بدل ما تبدأ حياتك من الصفر، كل حاجة موجودة قدامك. وفي نفس الوقت هتكون جنب ابن أخوك وتحافظ على اللي أخوك سابه.
قلتلها: يعني إنتِ عايزاني أتجوز علشان الشقة والعربية؟
قالتلي: أنا بقولك فكر في مستقبلك، دي فرصة تستقر وتبقى جنب ابن أخوك، ومش هتفضل شايل هم الإيجار ومصاريف الشقة.
وبعدين دخلت في موضوع تاني وقالتلي: يا سيدي، بدل ما تاخد شقة إيجار وتصرف عليها وتوضبها، أنا أقولك على حاجة. إنت خليك في شقة أخوك التمليك، وبعدها تعالى هنا عندي. تاخد أوضتك وأوضة أخوك اللي كان بيقعد فيها لما ييجي يزورني، تفتحهم على بعض وتوضبهم وتجهزهم لخطيبتك اللي إنت كاتب كتابك عليها. وبعد ما تعدي سنوية أخوك تتجوزها وتجيبها تعيش معايا هنا في شقتي.
قلتلها: يعني إنتِ عايزاني أعيش مع خطيبتي هنا عندك؟
قالتلي: أيوه، أهي كده أنا وفرت عليك الإيجار ومصاريف شقة جديدة، وبعد ما ربنا ياخد أمانته الشقة هتبقى بتاعتك. وبعدين أنا كمان مش عايزة أفضل لوحدي، أخوك الله يرحمه كان بييجي يقعد معايا يومين في الأسبوع، ودلوقتي مفيش غيرك. إنت تبقى قريب مني وتيجي عليا، وأنا أكون وسطكم.
أمي فضلت تقولي إن ده حل يرضي كل الأطراف، وإن خطيبتي لو بتحبني وبتعزني هتقدر ظروفي وتوافق. وقالتلي كمان إن مش لازم أدخل معاها في تفاصيل تانية، المهم أقول لها إننا هنعيش هنا بعد الجواز.
لما عرضت على خطيبتي الموضوع، رفضت تمامًا وقالتلي إنها مش هتقبل تبدأ حياتها بالشكل ده، ولا هتعيش في بيت أمي، وإنها كانت مستنية تتجوز وتعيش معايا في بيت مستقل، مش تدخل تعيش وسط العيلة. وبعد نقاش طويل قالتلي إنها مصممة على الطلاق ومش هتكمل بالشروط دي.
أمي لما عرفت قالتلي: خلاص يا ابني، هي اللي اختارت، وإنت عرضت عليها حل يريحكوا ويوفر عليكم مصاريف كتير، وهي رفضت. ما تحملش نفسك ذنب قرار هي خدته.
وبصراحة أنا وافقت على طلبها، وقلت لنفسي إنها هي اللي أصرت على الطلاق، وإن أنا ما أجبرتهاش على حاجة. لكن جوايا إحساس إني يمكن ما كنتش واضح معاها من الأول، وإنها ما كانتش تعرف كل اللي أمي بتفكر فيه.
وبعد ما الموضوع انتهى، أمي اتكلمت تاني مع مرات أخويا، ولما عرفت إني بقيت من غير ارتباط وافقت رسمي على الجواز. واتفقنا إننا نستنى الأيام الباقية من عدتها، وبعد ما تخلص نكتب الكتاب، وندي نفسنا حوالي شهر نغير أوضة النوم ونجهز الشقة، وبعدها نتجوز ونعيش في شقة أخويا التمليك.
والحقيقة إني بقيت متلخبط. مرات أخويا بنت ناس وأصيلة وجميلة، وابن أخويا محتاج حد يقف جنبه، وفوق ده كله شقة تمليك وعربية وحياة أريح من اللي كنت بجهز لها في شقة الإيجار. وفي نفس الوقت خطيبتي اللي استنتني سنتين انتهى جوازنا، وأنا عارف إنها كانت بتحبني ومشيت لأنها رفضت تعيش بالطريقة اللي أمي عرضتها عليها.
مش عارف أنا كده ظلمتها ولا لأ، ولا فعلًا هي اللي اختارت الطلاق زي ما أمي بتقول. ومش عارف أنا داخل الجوازة دي علشان أكون سند لابن أخويا، ولا علشان مرات أخويا عاجباني، ولا علشان كل المميزات اللي هتتفتح قدامي. كل اللي أعرفه إن أمي شايفة إنها دبرت لي حياتي، وأنا بدأت أقتنع بكلامها، بس مش قادر أتجاهل إحساسي إني يمكن خسرت بنت كانت تستاهل مني صراحة أكتر من كده.

