إخواتي قرروا يبيعوا بيت أبويا ويقسموا تمنه، وأمي لسه عايشة فيه! ولما اعترضت، اكتشفت إنهم محددين مصير البيت، لكن محدش فكر أمي هتروح فين بعده!

أنا عندي 36 سنة، ومتجوزة بقالي 14 سنة وعندي طفلين. أبويا متوفي من 6 سنين، وإخواتي الولاد التلاتة كل واحد اتجوز واستقل بحياته، وأنا كنت أكتر واحدة قريبة من أمي وبروح لها باستمرار.

جوزي شغال بره مصر، وأنا طول السنة بكون هنا مع العيال علشان مدارسهم، وفي الإجازة الكبيرة باخدهم وأسافر له، وبنقعد عنده حوالي تلات أو أربع شهور.

أمي عندها السكر من سنين، ومن فترة حصلت لها مضاعفات شديدة، وللأسف الأطباء اضطروا يبتروا رجلها لحد الركبة. ومن وقتها بقت حركتها صعبة ومحتاجة مساعدة في حاجات كتير، وأنا اللي كنت بروح لها وأقعد معاها وأقضي لها طلباتها.

من كام يوم إخواتي كانوا عند أمي، وسمعتهم بيتكلموا عن بيع الشقة، وكل واحد بيحسب نصيبه من تمنها. استنيت لما مشيوا وكلمت أخويا الكبير وقلت له: هو إنتوا فعلًا ناويين تبيعوا الشقة وأمي لسه عايشة فيها؟

قال لي: أيوه، وإحنا اتفقنا إن كل واحد ياخد حقه، وأمي مش هنسيبها، هتعيش معانا وكل واحد يشيلها فترة.

قلت له: يعني إيه كل واحد يشيلها فترة؟ أمي بالحالة دي هتقدر تفضل تتنقل من بيت لبيت؟

قال لي: ما إحنا عيالها، ومش هنسيبها، وإنتِ كمان هتكوني موجودة معاها.

قلت له: أنا طول ما أنا في مصر أمي ممكن تيجي تعيش معايا، وأنا هخدها وأرعاها، لكن أنا كل سنة بسافر لجوزي في الإجازة الكبيرة وبقعد عنده تلات أو أربع شهور. الفترة دي أمي هتكون فين؟ مين هيكون معاها ويراعيها؟ دي محتاجة مكان ثابت وحد يكون جنبها، مش كل شوية ننقلها على حسب ظروفنا.

بعدها بيومين رحت لأمي، لقيتها بتسألني إذا كان إخواتي فعلًا ناويين يبيعوا الشقة، وقالت لي إنها سمعتهم بيتكلموا وإنها مش عايزة تخرج من بيتها. حاولت أطمنها، لكنها قالت لي إنها مش هتسيب بيتها، ومش هتمضي على أي ورق يخص البيع، وإنها مش عايزة حد يقرر عنها وهي لسه عايشة.

وبعدها لما إخواتي اتكلموا معاها في الموضوع، قالت لهم بنفسها إنها مش موافقة على البيع، وإنها مش هتمضي على أي تنازل أو ورق يخرجها من بيتها.

أنا قلبي مش مطمن، خصوصًا إن الورثة إحنا أنا وأمي وإخواتي التلاتة، ونصيب أمي ونصيبي أقل من نصيب كل واحد فيهم، وخايفة مع الوقت يضغطوا عليها أو يحسسوها إنها معطلاهم عن حقهم، وهي ست كبيرة ومريضة ومش ناقصة ضغط نفسي.

أنا كمان مش عايزة أخسر إخواتي ولا تتحول المسألة لخناقة وقطيعة بينا، لكن في نفس الوقت مش هقدر أسافر وأسيب أمي وسط الخلاف ده، وأفضل طول فترة سفري خايفة عليها وعلى حقها.

أنا مش عارفة أضمن حق أمي إزاي، وفي نفس الوقت أحافظ على علاقتي بإخواتي إزاي، خصوصًا إنهم مصممين على البيع وأمي رافضة تسيب بيتها.