الأهلي يحذر لاعبيه من “فخ” استفزازات الترجي، وخطة “ضبط النفس” سلاح توروب لفك الشفرة التونسية!
وجه جهاز الكرة بالنادي الأهلي تحذيرات شديدة اللهجة للاعيبة الفريق قبل ساعات قليلة من الملحمة الأفريقية قدام الترجي التونسي باستاد القاهرة. المصادر من جوه التتش أكدت إن الكلام كان واضح: “إياكم والانسياق وراء أي استفزازات”.
الجهاز الفني حذر اللاعيبة إن لاعيبة الترجي ممكن يلجأوا لأساليب “نفسية” عشان يخرجوا نجوم الأهلي عن تركيزهم ويضيعوا وقت الماتش، خاصة إن الفريق التونسي داخل اللقاء بـ “أعصاب هادية” بعد فوزه في الذهاب بهدف نظيف، وهدفه الأول هو “جر شكل” لاعيبة الأحمر لتعطيل ريتم اللعب السريع.
التعليمات ركزت على ضرورة “ضبط النفس” والهدوء لأقصى درجة؛ فماتشات الحسم اللي زي دي بتتحسم بـ “الثبات الانفعالي” قبل الفنيات. جهاز الكرة شدد على إن أي غلطة ناتجة عن نرفزة أو اعتراض على الحكم ممكن تكلف الفريق كارت أحمر أو فاول م لوش لزمة يقلب الموازين، وده اللي توروب مش عايزه يحصل نهائي. الأهلي محتاج الـ 90 دقيقة كاملة في ضغط مستمر، وأي “خناقة” جانبية هتكون في مصلحة التوانسة اللي هيحاولوا يقتلوا الماتش “إكلينيكياً” بالدفاع المستميت بكل الطرق الممكنة.
إدارة الكرة وضحت للاعيبة إن الترجي هيلعب “بدون ضغوط” وهيقفل كل المساحات، وممكن يستخدموا “خبراتهم” في استهلاك الوقت واستفزاز الخصم بكرة وبدون كرة. عشان كدة، “الذكاء” هو الحل؛ لازم لاعيبة الأهلي يتعاملوا بخبرتهم الأفريقية الكبيرة، ويركزوا بس في تنفيذ الخطة الفنية وهز الشباك بدري، لأن الهدف المبكر هو الوحيد اللي هيفك “التكتل الدفاعي” ويخلي لاعيبة الترجي هما اللي يتوتروا ويخرجوا عن شعورهم.
في النهاية، جهاز الكرة جدد ثقته في “شخصية الأهلي” وقدرة الجيل الحالي على تجاوز المواقف الصعبة دي. الرسالة كانت واضحة: “العبوا كورة وبس، والرد يكون في الملعب بالأهداف”. استاد القاهرة هيكون مشتعل بالهتافات، والجمهور مستني يشوف “فريق بطل” م بتهزهوش الاستفزازات وعينه بس على تذكرة نصف النهائي. هل هيقدر زيزو ورفاقه يحافظوا على هدوئهم ويحققوا “الريمونتادا” المطلوبة؟ الساعات الجاية هي اللي هتحسم “صراع الأعصاب”.
