“توروب يخرج عن صمته”.. اتهامات متبادلة في الأهلي: “إدارة الأهلي فرضت صفقات الشتاء عليه”
ييس توروب قرر “يفتح النار” ويحمي نفسه من مقصلة الجماهير؛ المدرب اشتكى رسمياً لإدارة الأهلي (ياسين منصور وسيد عبد الحفيظ) من غياب “الحماية” بعد حملة الهجوم العنيف اللي اتعرض لها بعد وداع أفريقيا. الصدمة الكبيرة كانت في كلامه عن الميركاتو الشتوي؛ توروب أكد إنه م طلبش “الزفة” اللي جات في يناير، وكل اللي كان محتاجه هو “مدافع ورأس حربة” وبس! الراجل فجر مفاجأة وقال إنه هو اللي رفض التعاقد مع يوسف بلعمري في وقتها، وشايف إن الصفقات اللي جات م كانتش بطلبه الفني، وده اللي خلاه يحس إنه شغال في “جزر منعزلة” بعيد عن رؤية لجنة التخطيط.
الأزمة م وقفتش عند الصفقات اللي جات، دي وصلت للاعيبة اللي مشيت؛ توروب كشف إنه كان متمسك جداً باستمرار جراديشار وشايفه قطعة أساسية في تشكيله، بس الإدارة “ركبت دماغها” ورفضت الإبقاء على اللاعب.
البديل كان التعاقد مع مروان عثمان ويلسين كامويش، والأسماء دي (حسب كلام شوبير) م كانتش على “هوى” توروب الفنية، وده اللي بيفسر ليه اللعيبة دي مش قادرة تقنع حد لحد دلوقت. توروب دلوقت بيحط الإدارة في “زنقة” حقيقية: إزاي تحاسبوني على نتائج فريق إنتوا اللي اخترتوا صفقاته ومشيتوا اللعيبة اللي أنا عايزها؟
الخلاصة إن “الأهلي” بيعيش حالة من التخبط الفني والإداري م حصلتش من زمان؛ فيه فجوة كبيرة بين فكر “تورب” وبين قرارات الإدارة. كلام توروب ده معناه إن “ساعة الرحيل” قربت جداً، لإن المدرب اللي بيطلع أسرار الميركاتو للإدارة بالشكل ده بيكون خلاص “باع القضية”. الجمهور دلوقت محتار: يصدق توروب اللي بيقول إنه م خدش طلباته؟ ولا يصدق الإدارة اللي جابت صفقات بملايين؟ الأكيد إن “الضحية” هو قميص الأهلي اللي بيخسر بطولات بسبب “صراع الصلاحيات” ده.
هل “ياسين منصور” هيتدخل وينهي المهزلة دي بقرار حاسم؟ ولا الحكايات لسه ليها فصول تانية؟
