“كأس العاصمة أو الرحيل”.. مستقبل عماد النحاس مع المصري مهدد بـ “منصة التتويج”.. والإدارة تربط الإفراج عن المستحقات بخطف اللقب الغالي!
كشف مصدر داخل نادي المصري البورسعيدي إن مصير الكابتن عماد النحاس، المدير الفني للفريق، معلق بشرط “انتحاري” وهو التتويج بلقب كأس عاصمة مصر. الإدارة وضحت إن عقد النحاس ممتد لنهاية الموسم، لكن استمراره الفعلي وتقدير مشواره مرتبط برفع الكأس، لإن طموح “النسور الخضراء” السنة دي ملوش سقف، ومجلس الإدارة شايف إن الوقت جه عشان تدخل بطولة جديدة لدولاب بطولات بورسعيد، خصوصاً مع الدعم الكبير وتوفير كل الإمكانيات للجهاز الفني واللعيبة من بداية الموسم.
ورغم “سكينة” الشروط دي، إلا إن الإدارة أكدت ثقتها في إمكانيات نجم الأهلي السابق، خصوصاً بعد تحسن الأداء تدريجياً في ماتش بيراميدز الأخير اللي خلص بالتعادل الإيجابي. المصدر أشار لإن الإدارة منسيتش إن النحاس هو اللي قاد الفريق لصدارة الدوري وقدر يفوز على الزمالك في ماتش تاريخي، وعشان كدة الرهان عليه لسه موجود، لكن “كأس العاصمة” بقا هو المقياس الحقيقي لنجاح التجربة دي، والضمانة الوحيدة لترسيخ أقدام الجهاز الفني لفترة أطول داخل قلعة المصري.
وفي رسالة “شديدة اللهجة” للعيبة، قررت الإدارة إن الإفراج عن المستحقات المالية المتأخرة مش هيحصل غير في حالة واحدة بس، وهي الفوز بكأس عاصمة مصر. الإدارة شايفة إنها عملت اللي عليها وزيادة، ودلوقتي الدور على الرجالة في الملعب عشان يثبتوا إنهم قد المسئولية ويفرحوا شعب بورسعيد ببطولة طال انتظارها، والقرار ده هدفه شحن البطاريات ورفع الروح القتالية لأقصى درجة قبل الماتشات الحاسمة في البطولة، لإن “المصري” مش هيقبل بغير منصة التتويج كتعويض عن المجهود اللي اتبذل طول العام
