الأهلي يستقر علي إقالة توروب في هذا الموعد؟!

“رصاصة الرحمة مؤجلة”.. الأهلي يحدد موعداً إقالة توروب لكسر “بند الحماية”!

استقر مسؤولو النادي الأهلي على الموعد النهائي للإعلان عن إقالة المدرب الدنماركي ييس توروب، والمفاجأة إن الإعلان مش هيكون مع آخر صافرة في الدوري زي ما الكل متوقع. مصدر من قلب التتش أكد إن الإدارة قررت تأجيل القرار الرسمي لغاية 30 يونيو المقبل، والسبب هو “بند الحماية” الموجود في عقد توروب واللي بيمنع النادي من إقالته قبل التاريخ ده بـ شروط ميسرة؛ الأهلي عايز يضمن إن فسخ العقد يتم بـ سداد راتب 3 شهور بس وفقاً للاتفاق، بعيداً عن أي تعويضات ضخمة تانية.

المفاجأة إن “تورب” هيقضي آخر أيامه في القاهرة بـ “إجازة طويلة”؛ النادي هيمنحه إجازة تصل لـ 3 أسابيع فور انتهاء الدوري في شهر مايو، والهدف هو “تبريد الأجواء” وإبعاد المدرب عن الفريق لغاية ما يجي موعد الجلسة الحاسمة بعد الإجازة مباشرة. الإدارة حطت النقط على الحروف وقفلت ملف التقييم الفني تماماً، والقرار دلوقت بقى “نهائي ولا رجعة فيه” بإقالة المدرب، حتى لو كسب الـ 6 ماتشات اللي فاضلة بـ نتائج تاريخية، وكأن الرسالة وصلت: “مشوارك خلص.. والمسألة مسألة وقت وقانون”.

الكواليس بتقول إن ياسين منصور وسيد عبد الحفيظ بدأوا فعلياً يجهزوا “البديل الأجنبي” اللي هيستلم المهمة في يوليو، عشان يبدأ فترة الإعداد للموسم الجديد والمونديال بـ روح مختلفة. الأهلي دلوقت بيتحرك بـ حذر شديد عشان م يقعش في أي غلطة قانونية تخليه يدفع مبالغ خرافية لـ تورب، والسيناريو المرسوم هو “إنهاء ودي” للعلاقة بـ شياكة يحفظ حقوق الطرفين ويقفل الصفحة اللي الجمهور م صدق إنها بتقرب من النهاية.

الخلاصة.. تورب “مقابل” لغاية 30 يونيو كـ اسم فقط، والإقالة “مسألة إجراءات”؛ والجمهور دلوقت بيعد الأيام لغاية “يوم الخلاص” وبداية عهد جديد في التتش. هل تفتكر إن “صبر الأهلي” لغاية يونيو عشان الفلوس قرار صح؟ ولا كان الأفضل يدفع ويمشيه دلوقت عشان يبدأ يجهز للموسم الجديد بدري؟ الأكيد إن “صيف 2026” في الأهلي بيبدأ بـ ثورة تصحيح شاملة ومدروسة بالمللي.