إيران من الداخل
مع الاعتذار للأستاذ فهمي هويدي
1ده كان عنوان كتاب لفهمي هويدي زمان قوي.. كان راح إيران بوصفها أول نظام دولة إسلامية بعد الخلافة العثمانية، وبيتفرج عليه من جوا.. مش فاكر قوي فحوى الكتاب، بس يعني حاجة حلوة يعني وأول نظام يطبق تعاليم الإسلام وهنشوف هيعمل إيه مع النظم المحيطة وكده. بس الحقيقة إيران من الداخل بالفعل لغز كبير ما حدش عارف عنه حاجة، بمعنى إن كل اللي سامعينه وشايفينه وبنقرا عنه تكهنات توقعات آمال حتى يمكن بالنسبة للبعض.. مش حباً في نظام الملالي ولا حباً في “الجمهورية الإسلامية”، على قد ما هو كره لأمريكا وإسرائيل.
2قرار الضربة الأمريكية له أكتر من مغزى الحقيقة.. ومغامرة ما حدش عارف بقى محسوبة ولا مش محسوبة العواقب، ده اللي هنعرفه في الحلقة الجاية.بمعنى إنك ما تفهمش فيه حد زق ترامب في الحفرة دي علشان يحرقه، ولا ترامب صدق حد تاني أكده له إن المعلومات اللي عندنا بتقول إن النظام كده اتلخلخ بما فيه الكفاية وآن أوان إزاحته، ومين فيهم اللي صح، ومين فيهم اللي عنده حق.. العلم عند الله.كلمة ترامب للشعب الإيراني “ساعة حريتكم قد حانت”، و”طلبتم مساعدة أمريكا ولم تحصلوا عليها من قبل، حيث لم يكن أي رئيس مستعدا لفعل ما أنا مستعد لفعله الليلة”.الكلمة دي بتقول إن فيه تحركات استخباراتية على الأرض، وفيه عملا، وشبكة، وجواسيس، والموضوع خلاص متستف، ويا دوب بس هنقعد ندعك في القيادات ومقرات القيادة قيمة أسبوعين تلاتة، قوم تطلعوا حضراتكم من تحت الأرض وتقفشوا السلطة والأبيج وكافة شيء ونعيش في تبات ونبات ونخلف صبيان وبنات وتوتة توتة خلصت الحدوتة في أرجاء الوطن العربي (لبنان، العراق، اليمن). ولكن.. تقدر تحلف على المصحف؟
3هو مش أمريكا برضك قالت لنا إن التحالف الشمالي بقيادة أحمد شاه مسعود هو اللي هيخلص إن شاء الله على طالبان، وهيمسك الحكم ويساعدنا وميت فل وأربعتاشر والدنيا هتزهزه؟ وبعدين مش أحمد الجلبي في العراق برضك كان هو اللي هيخلص الليلة ف العراق والأمن يستتب والاستقرار هيعم في الشرق الأوسط؟إيران قد العراق أربع مرات سعادتك، وقد أفغانستان مرتين تلاتة.. وحضرتك داخل بعزم ما فيك على ناس ما تعرفش طبيعتهم ولا طبيعة نظامهم والمعلومات اللي عندك مش دايما دقيقة، بدليل اللي حصل في يونيو، واللي حصل أثناء المظاهرات الأخرانية، وبدليل اللي حصل مع شبكة “ستارلينك”.. حضرتك مش بالفتاكة اللي انت فاكرها ولا اللي انت بتصدرها لنا.. معلهش يعني فيه حاجات تانية على الأرض ممكن تبقى مفاجآت. ما حدش بيتكلم قطعاً لا على تدمير حاملات طائرات، ولا ضربات إيرانية موجعة، ولا مساعدات من الصين وروسيا.. كل ده ممكن يكون كلام فاضي فعلاً. لكن اللي باتكلم عنه هو الداخل الإيراني، إيران من الداخل على رأي عمونا فهمي هويدي.. 4حضرتك شخرمت أم مقرات القيادة، وشخرمت القيادات، وقتلت المرشد، وحققت كل الحاجات العظيمة اللي قال عليها الاهبل نتنياهو.. (الله أعلم يمكن ما يكونش أهبل واحنا اللي هبل ومش فاهمين الدنيا! أدينا هنشوف). ماذا يحدث في اليوم التالي؟تاني يوم الصبح حضرتك مين في الشارع؟هل المعارضة الإيرانية اللطيفة الظريفة اللي ما بتقولش “الموت لأمريكا” هتنزل الشوارع والميادين وتمسك الحكم في إيران؟طيب والهيصة والهالوما والحرس الثوري والباسيج واللي بيحترموهم؟ طيب والوطنيين اللي ما لهومش في البطيخ بس شايفين إن أي حد يدخل على صهوة حصان أمريكاني يبقى خاين؟ يكرهوا المرشد والحكم الديني وكل حاجة، بس فرس وما حدش يدخل على حصان أمريكاني أبدا.. دول هنعمل فيهم إيه، وهيقفوا ف صف مين؟على فكرة، ممكن يكون الجدع ترامب ومن وراه نتنياهو عندهم معلومات والدنيا تمشي زي السكينة في الجاتوه، وميت فل، ويحصل زي فنزويلا، ويبقى فيه خيانات من الداخل ونبلبط سوا ونغمس ف طبق العسل الأسود بالطحينة عادي جداً.طيب ولو ما حصلش؟طيب ولو ناس في العراق ابتدت تشتغل؟لو ناس في لبنان ابتدت تشتغل؟اليمن؟طيب ولو إيران قفلت مضيق هرمز؟ لو ضربت قواعد ومصافي في الخليج؟ الخليج كله زي ما حضرتك عارف أوضة وصالة.. والصواريخ الإيرانية ممكن توصل لقاعدة اتنين، مصفاة اتنين.. شيء من هذا القبيل. وسعر البترول ساعتها هيروح فين؟ فيه تصور؟وبعدين هرمز ده ديته سفينتين ولا تلاتة يغرقوا وشكراً جداً جزيلاً.. الصين كده هتقلع وتنزل تلطم على شبابها واقتصادها اللي هيتخنق.طيب وسلاسل الإنتاج.. البضاعة اللي رايحة جاية من وإلى الخليج؟ إيه النظام يا معلم؟ما هو زور العالم في مضيق هرمز وفي اقتصاد الخليج. واللي هيمسك زور العالم هيخنق البشرية واحنا مش ناقصين. اللي فينا مكفينا.الضربة الأمريكية الإسرائيلية كانت حتمية والخبراء كلهم قالوا كده، لإنه ما ينفعش كل الحشد العسكري الضخم ده ينزل الشرق الأوسط علشان يتشمس.. بس الضربة الأمريكية الإسرائيلية ضد إيران بتاريخ 28 فبراير 2026 هتبقى صفحة مهمة وبارزة في التاريخ بوصفها بداية لتاريخ جديد هيتكتب بدم البشر في هذه المنطقة المنكوبة من العالم.أهلا بيكم في الحرب العالمية الثالثة..
