9 قرارات انتحارية تقلب الطاولة في الأهلي: “إلغاء لجان.. رحيل كبار.. وخصم 20% من عقود اللعيبة!”
القرارات اللي طلع بيها ياسين منصور وسيد عبد الحفيظ هي “الضربة القاضية” لكل اللي فات؛ البداية كانت بـ إلغاء لجنة التخطيط ورحيل الأسماء الكبيرة زي مختار مختار وزكريا ناصف، وده معناه إن زمن “المشورة الفنية” اللي كانت بتعطل الصفقات انتهى. مش بس كدة، ده حتى محمود الخطيب شخصياً مابقاش رئيس لجنة الكورة الجديدة، والصلاحيات راحت بالكامل لـ “منصور وعبد الحفيظ” ومعاهم نجوم سابقين لسه هيتم اختيارهم.
دي “حركة جريئة” جداً بتبين إن الأهلي قرر يفصل “الإدارة” عن “النجومية” عشان يلحقوا اللي ضاع بعد فضيحة الترجي، والرسالة واضحة: “المسؤولية المرة دي في إيد محترفين وبس”.
“مقصلة الرحيل” طالت الكل ومسابتش حد؛ من أول ييس توروب اللي تأكد رحيله نهاية الموسم (عشان قصة الشرط الجزائي)، لحد وليد صلاح الدين مدير الكورة، ووليد سليمان رئيس قطاع الناشئين، وحتى أسامة هلال بتاع الاسكاوتنج والتعاقدات اللي مرشح مكانه عصام سراج. الأهلي بيفضي “الكراسي الكبيرة” عشان يضخ دماء جديدة بفكر مختلف. والجديد كمان إن محمد يوسف اتشال من منصب المدير الرياضي (اللي اتلغى أصلاً) واتعرض عليه قطاع الناشئين، وده معناه إن “السيستم الإداري” القديم كله اتشطب عليه بـ “أستيكة” وبدأنا صفحة بيضا تحت إشراف “الديزل” و”الملياردير”.
أما “اللسعة الحقيقية” فكانت في الغرامات المالية اللي م رحمتش حد؛ خصم 20% من عقود اللعيبة ده رقم مرعب بيحسسهم إن “الخروج الأفريقي” تمنه غالي جداً ومبيتمحيش بكلمتين اعتذار. الجهاز الفني والطبي والإداري كمان م سلموش واتوقعت عليهم غرامات قوية.
الأهلي المرة دي “كشر عن أنيابه” وباع الدلع، والـ 9 قرارات دول هما “دستور التتش” الجديد اللي بيقول: “البقاء للأقوى وللي هيجيب بطولات بس”.
الجماهير دلوقت بدأت تتنفس الصعداء لإنها شافت “فعل” مش مجرد “وعود”، والموسم الجاي هيكون أهلي بـ “جلد جديد” تماماً.
